So tšimbako omsoroga hin?

Tšimbako omsorogaha starkavena vauroȟlaaga maneeri te angouven tšimbako rikkiba. Tšimbako omsoroga vojuvela aaȟȟel tšimbako struktuuri, tekstengo omsoroga elle tšimbako stedosko omsoroga. Aro tšimbako omsoroga farabavena tšimbako rikkiba ta dena dotta farabibongo botnosta sikjibi so hin följavena pengo starakiba jakkes tšiȟkas sar myördamanneskiiro. Doolesko ȟaal ka tšimbako rikkiba parula stunnata ar vauro ta tekstosko ta stiilosko ȟlaagensa, tšimbako omsoroga dela džaaniba dotta savoȟlaaga tšimb sote rakkaven elle rannel aro vauroȟlaaga stunni ta, dotta savoȟlaaga paribi fanuvena aro tšimb, ta rekommendatsii so tšalavena doola.

Aro tšimbako struktuurengo omsoroga roodena ta sikavena liinesko tšimb ta sakko divisakiiro tšimb, doolesko struktuuri, laave ta naave. Buttiako guosi hin tšimbako omsorogako oppenbaaribosko partija, sikjiboski liine, sikjibosko artikli, laavesko liine ta sikjibosko stunni.

Aro tekstengo omsoroga roodena savoȟlaaga tšimb rannena aro indivuaale stunni. Frestiba hin te teksti fendjaven jakkes at dola aaȟhȟenas sar tšiȟhka sar myördamanneskiiro aro pengo konteksti. Tekstengo omsorogako buttiako maneeri hin skooliba, tšimbako konsultiba ta tekstengo džinom dikkiba.

Puȟȟiba hin tšimbako stedosko omsorogata taala ka roodena ta följavena tšimbako pariba ta tšeeribi aro sosieteetos ta frestavena te angouven tšimbako  kommuniteetosko džintako rikkibi tšimbako politiikosko tenkibosko oppenbaaribonna. Frestiba hin ȟaȟtaven douva, at iego tšimb rakkavenas ta rannenas jakkes boȟles sar myördamanneskiiro ta na byrjuna rakkaven elle rannen tši vauro tšimb aro fuortune thaane.

Aro Fnnosko tšimbengo instituutos omsorogaven finnosko, sveittiko, saamesko tšimb, finitiko sikibosko tšimb ta romani tšimb. Tšimbako omsorogako saakako džaaniboskierengo orgaane hin dola tšimbengo rakkibosko skokki jakkes sar tšettibi biȟavena.

Tšimb ȟunjula saarenge, ta doolesko ȟaal frestavena te tšimbako omsorogako sikjibi aaȟȟenas lokke ta klaare. Frestiba hin tšeeren tšimbako omsorogako rekommendatsienna ajaveene, te saare tšimbako rakkiboskiiren elle ranniboskiiren hin lokke te gotjaven doolen aro pengo iego starkibi.